Әлем чемпионатында төбе көрсеткен балуандар мемлекеттік наградалармен марапатталды
Мемлекет басшысы Қасым-Жомарт Тоқаев Хорватияда өткен күрес түрлері бойынша Әлем чемпионатында ел абыройын асқақтатқан спортшылар мен олардың бапкерлерін мемлекеттік наградалармен марапаттау жөнінде Жарлыққа қол қойды.
Жоғары жетістіктері үшін «Құрмет» ордені Спортты дамыту дирекциясының нұсқаушы-спортшысы Айдос Сұлтанғалиге табысталды. Дәл осы марапатқа нұсқаушы-спортшы Нұрқожа Қайпанов пен жаттықтырушы-оқытушы Камал Гаджимагомедов та ие болды.
Сондай-ақ, әлемдік додада ел намысын лайықты қорғаған Асылжан Есенгелді мен жаттықтырушы Еркебұлан Кешубаев «Ерен еңбегі үшін» медалімен марапатталды. Ал әйгілі бапкер Юрий Мельниченкоға Президенттің арнайы Алғыс хаты жарияланды.
Қазақ балуандарының бұл жетістігі ел спортының дамуы мен жас буынға үлгі болары сөзсіз.