Әлем чемпионы Карлос Адамес Жәнібек Әлімханұлынан қашты деген айыпқа жауап берді
Бокс
Нұрғали Жұмағали
Орта салмақта WBC нұсқасы бойынша әлем чемпионы Карлос Адамес қазақстандық Жәнібек Әлімханұлымен жекпе-жектен қашып жүр деген айыптарға жауап берді.
Әлеуметтік желі қолданушыларының бірі Адаместің Жәнібекпен жекпе-жекке қызығушылық танытпағанын атап өтті:
– Мен Жәнібектің саған бірнеше жыл бойы ашық шақыру тастағанын көрдім. Бірақ сенің тараптан ешқандай әрекет те, жауап та болмағанын байқадым. Тіпті Twitter-де бірде-бір реакцияңды көрмеппін, – деп жазды жанкүйер.
Адамес бұл пікірге:
– Олай емес. Менің промоутерлік компаниям оған ресми ұсыныс жіберді, бірақ ол жауап бермеді. Хат та жолдадық – ешқандай реакция болған жоқ, – деп жауап қатты.
Алайда басқа бір қолданушы бұл мәлімдемені жоққа шығарып, Адаместі манипуляция мен фактілерді бұрмалады деп айыптады:
– Жәнібек оған нақты қаржылық ұсыныс көрсетілген келісімшарт жіберді. Адаместің міндеті тек қол қою болатын. Бірақ ол тек Жәнібектің промоутеріне: «Адамес пен Жәнібек арасындағы жекпе-жекті өткізгіміз келеді» деген екіұшты хабарлама жіберумен шектелді. Бұл нақты әрекет емес, жай сөз ғана, – деп жазды.
Бұл пікірге Адамес қысқа ғана «жалған» деп жауап қайырды.