“Манчестер Сити” мен “Манчестер Юнайтед” арасындағы матч кезінде жанкүйер көз жұмды
GETTY IMAGES
Англия Премьер-лигасының 16-турында өткен “Манчестер Сити” мен “Манчестер Юнайтед” арасындағы матч кезінде қайғылы жағдай орын алды, деп хабарлайды BasSport.kz.
Манчестердегі “Этихад” стадионында болған ойында жанкүйерлердің бірі қайтыс болды. “Манчестер Сити” клубы бұл оқиғаға қатысты ресми мәлімдеме жасап, қайғыға ортақтасатындарын жеткізді. Клубтың X әлеуметтік желісіндегі парақшасында:
“Кеше болған матч кезінде орын алған медициналық жағдайдан кейін жанкүйеріміздің көз жұмғаны туралы ауыр хабар жетті. Барша клуб атынан марқұмның отбасы мен жақындарына көңіл айтамыз”, – делінген.
Айта кетейік, бұл матч 15 желтоқсанда өтті. Ойын қорытындысы бойынша “Манчестер Юнайтед” 2:1 есебімен жеңіске жетті. Осы нәтижеден кейін “Манчестер Сити” 27 ұпаймен турнир кестесінде бесінші орынға тұрақтаса, “Манчестер Юнайтед” 22 ұпай жинап, 12-орынға көтерілді.