Африка арыстандары. Морокко құрамасы сенсация жасайды
Әлем чемпионатына шыққан құрамалардың ішінде ерекше командалар бар. Соның бірі – Морокко құрамасы.
Морокко құрамасы үшін бұл 6 Әлем чемпионаты. 1986 жылғы Мехикодағы біріншілікте «атлас арыстандары» 1/8 финалға жолдама алған. Сол кезде Африкадан келген команда өз тобында бірінші орын иемденеді. Плэй-офф сатысының алғашқы кезеңінде оларға мықты қарсылас түсіп қалды. Сол мундиальдың финалына жеткен ФРГ құрамасы тек ойынның 88 минутында гол салып жеңісті жұлып алды. Гол авторы – Лотар Маттеус. Ал соңғы чемпионатта Морокко өз тобынан шыға алмай, төртінші болып қалды. Ресейдегі біріншілікте Морокконың тобында Испания мен Португалия болды. Иран құрамасы да Мороккодан басым түсті.
2022 жылғы доп додасына Морокко еш қиналмай шықты. Алғашқы топтық кезеңде 6 ойынның алтауын да жеңіп, 18 ұпай жинады. Одан кейін өтпелі ойындардың кезегі келіп, Демократиялық Республика Конгоның құрамасы қарсылас болып түсті. Алғашқы ойында Морокко 1:1 тең түсті. Ал жауапты ойында алаң иелері 4:1 есебімен жеңіске жетті. Рабат қаласындағы орталық стадионның шаттығы көпке созылды. Елдің басты командасы Қатарда өтетін әлем чемпионатына жолдама алды. Бұл әлбетте кез-келген мемлекет үшін ұлттық мереке. Халық бұл жетістікті екі күн бойы тоқтамастан тойлатты.
Африка кубогында сәтсіз ойнағаннан кейін Морокко құрамасы бас бапкер Вахид Халилходжичті қызметінен алды. Оның орнына Морокко чемпионатын екі түрлі клубпен жеңген, жергілікті жас маман Валид Реграги келді. Жалпы бұл қалыпты жағдай. Морокко Әлем чемпионатының алдында үнемі бапкер ауыстырады. Вахидтің орнына Валид келіп команда одан әрі күшейе түсті.
Енді Морокко құрамасының ойыншыларына тоқтала кетсек. Қақпашы Ясин Буну «Севилья» намысын қорғап жатқанына біршама жыл болды. Бұл қақпашы Еуропа лигасының чемпионы.
Қорғаныста ойнайтын Ашраф Хакими Морокко құрамасының көшбасшы ойыншыларының бірі. ПСЖ сапында кілең шоқ жұлдыздармен ойнап үйреніп қалған аяқдопшы. Одан бөлек «Фиорентинаның» ойынын ұстап тұрған Софьян Амрабат бар. Ол атақты ойыншы Нуриддин Амрабаттың інісі. Бильяль Эль-Ханнус деген 18 жастағы футболшы қазірдің өзінде алпауыт ұжымдардың назарында. Осы Әлем чемпионатында бұл футболшы «Жаңа есім» номинациясын жеңуі ықтимал. Қазір ол «Генк» командасының намысын қорғайды. Қорғаныста соныдай-ақ, «Бавария» сапында ойнайтын Нусаир Мазрауий деген футболшы бар. Қорғаныс пен шабуылды жалғайтын латераль ойыншы Чемпиондар лигасында көзге түсіп жүр.
Команданың шабуылдағы негізгі күші Хаким Зиеш екені түсінікті. «Челси» футболшысы ұлттық құраманы іріктеу сынында алға сүйреген. Оның қасында «Севильяда» ойнайтын шабуылшы Юссеф Эн-Несери бар. 25 жасар Абдельхамид Сабири жұлдызы арқырайын деп тұрған футболшылардың бірі. Бұл жартылай қорғаушы қазір Италияның «Сампдория» командасының негізгі футболшысы. «Марсель» жартылай қорғаушысы Амин Ариттен үміт көп. Алайда, бұл футболшы кішігірім жарақат алып, қазір дайындық өткізіп жатыр. Әйтпесе бұл футболшы Францияның жастар құрамасының ойынысы болатын.
Жалпы алғанда Морокко футболы таланттарға өте бай. Кезінде дүркіреген Мұстафа Хаджиден кейін, Нуриден Найбет, Эль Каддури, Маруан Шамах, Мүбарак Бусуфа, Эль Хамдауи секілді атақты ойыншылар болды. Одан бөлек өзге мемлекеттің құрамасына ойнаған қаншама морокколық футболшы бар десеңізші. Маруан Феллаини, Ибрагим Аффелай, Насер Баразит, Набиль Алиуй, Кевин Малькюи секілді футболшылар Еуропаға қоныс аударғаннан кейін Мороконы емсе, өзге мемлекеттердің құрамаларына ойнаған. Бұрын Бельгия құрамасында Марокодан шыққан футболшылар өте көп болатын. Осы чемпионатта Марокко құрамасы сол Бельгиямен бір топта ойнайды.
Ал алғашқы ойын олар үшін өте ауыр болады. 1-турда африкалықтар Хорватия құрамасымен кездеседі. Одан кейін Бельгиямен тартысты матч күтіп тұр. Үшінші ойында Канада құрамасымен күш сынасады. Хорватия мен Бельгия сияқты алпауыттармен тең ойнап, Канаданы жеңсе өз тобында екінші орынмен де плэй-офф сатысына шығуы ықтимал.
Авторы: Ермұхамед Мәулен