2025 жыл: Қазақстан спорты үшін есте қалған оқиғалар

2025 жыл қазақстандық спорт тарихында табысты нәтижелермен, тың жетістіктермен және есте қаларлық сәттермен айрықша орын алды. Ел намысын қорғаған спортшылар халықаралық ареналарда сан түрлі спорт түрінен олжа салып, ұлттық спорттың әлеуеті мен беделін көрсетті.

Қытайдың Харбин қаласында өткен Қысқы Азия ойындары Қазақстан құрамасы үшін ерекше болды. Отандастарымыз 4 алтын, 9 күміс және 7 қола медаль жеңіп алып, жалпыкомандалық есепте төртінші орынға тұрақтады. Бұл жарыста шорт-трек пен фристайл-акробатика ерекше көзге түсті. Ерлер арасындағы шорт-трек эстафетасында Қазақстан құрамасы тұңғыш рет алтын медаль иеленіп, тарихи жетістікке қол жеткізді. Ал фристайлдағы синхронды секіруде Шерзод Хаширбаев пен Роман Иванов жеңіс тұғырынан көрінді. Хоккейден ерлер құрамасы бесінші мәрте Азия чемпионы атанса, әйелдер құрамасы алғаш рет күміс жүлдені еншіледі.

Көркем гимнастикада жас талант Ақмарал Ерекешева жасөспірімдер арасындағы әлем чемпионатында доппен орындалған жаттығуда үздік атанды. Кейін таспамен өткен финалда да жеңіске жетті. Ал шығыршықпен орындалатын жаттығуда ол екінші орынға ие болып, жасөспірімдер арасындағы әлем чемпионатында жеңіске жеткен санаулы қазақстандық гимнастардың бірі атанды.

Әртістік жүзуден Қазақстан құрамасы Үндістанның Ахмедабад қаласында өткен Азия чемпионатының Кубогінде жалпыкомандалық есепте топ жарып, 7 алтын медальға ие болды. Сонымен қатар жүзу спортынан қазақстандық спортшылар 10 жүлде жеңіп алып, су спортының даму деңгейін көрсетті.

Бангкокта өткен джиу-джитсудан әлем чемпионаты да ел спортшылары үшін олжалы болды. Қазақстан құрамасы 11 алтын, 16 күміс және 13 қола медальмен жалпыкомандалық есепте жеңіске жетті. Ал Ливерпульде ұйымдастырылған World Boxing ұйымы аясындағы әлем чемпионатында қазақстандық боксшылар 7 алтын, 1 күміс және 2 қола медаль еншілеп, жалпыкомандалық есепте көшбасшы атанды.

2025 жыл қазақстандық футбол үшін де тарихи белеске айналды. Алматының «Қайрат» футбол клубы тұңғыш рет УЕФА Чемпиондар лигасының негізгі кезеңіне жолдама алды. Іріктеу барысында команда шотландиялық «Селтикті» жарыстан шығарып, ел футболының абыройын асқақтатты. Сол шешуші кездесуде қазақстандық қақпашы Темірлан Анарбеков пенальтиді қайтарып, матчтың қаһарманы атанды. Кейін «Қайрат» мадридтік «Реалмен» жасыл алаңда жолығып, жанкүйерлерге ұмытылмас әсер сыйлады.

Футзалдағы «Қайрат» клубы УЕФА Чемпиондар лигасында күміс медаль жеңіп алды. Сонымен қатар 2027 жылы Қазақстан алғаш рет 19 жасқа дейінгі жасөспірімдер арасындағы футзалдан Еуропа чемпионатын қабылдайтыны белгілі болды.

Күрес әлемінде де тарихи жаңалық тіркелді. Айдос Сұлтанғали (60 кг) Загребте өткен грек-рим күресінен әлем чемпионатында алтын медаль жеңіп алып, XXI ғасырда осы спорт түрінен Қазақстанға тұңғыш әлем чемпиондығын сыйлады.

Қазақстандық бокстың аңыз тұлғасы Геннадий Головкин 2025 жылдың қараша айында World Boxing ұйымының президенті болып сайланды. Осылайша ол халықаралық спорт федерациясын басқарған алғашқы қазақстандық атанды. Сонымен бірге Геннадий Головкин Қазақстан Ұлттық Олимпиадалық комитетінің президенті қызметін де атқарып келеді.
Ауыл спортының дамуына серпін берген AUYL SPORT жобасы 2025 жылы да кең ауқымда жүзеге асты. Елдің түкпір-түкпірінен 10 мыңнан астам ауыл баласы жобаға қатысып, бокс, күрес, баскетбол, волейбол және шахмат секілді спорт түрлерімен жүйелі түрде айналысты. Жобаның тәрбиеленушілері халықаралық жарыстарда Қазақстанға алғашқы медальдарын алып келіп, ISF U-15 Гимназиадасындағы алтын жүлде ауыл спортшыларының зор әлеуетін дәлелдеді.

Қорыта айтқанда, 2025 жыл Қазақстан спорты үшін мазмұны терең, маңызы зор жыл болды. Халықаралық аренадағы жарқын нәтижелер, тарихи жеңістер мен жаңа бастамалар ел спортындағы жүйелі жұмыстың, тұрақты дамудың және болашаққа нық қадамның айқын көрінісіне айналды.