«Мен оны құрметтемеймін». Әлем чемпионы Жәнібек Әлімханұлына сын айтты
Британдық боксшы Дензел Бентли орта салмақта WBO нұсқасы бойынша «уақытша» әлем чемпионы атанып, қазақстандық Жәнібек Әлімханұлына қатысты сын пікір білдірді.
4 сәуір күні Лондонда өткен жекпе-жекте Дензел Бентли венесуэлалық Эндри Сааведраны жетінші раундта техникалық нокаутпен жеңді.
Аталған титулдық айқас WBO шешімімен ұйымдастырылды. Бұған Жәнібек Әлімханұлының өткен жылдың желтоқсан айында мельдонийге қатысты оң допинг-сынама беруіне байланысты бір жылға жарыстардан шеттетілуі себеп болған.
Жеңістен кейін Бентли қазақстандық чемпионға қатысты көзқарасын ашық жеткізді:
«Бір нәрсені нақтылайық: мен — әлем чемпионымын. Ол да чемпион, бірақ қазір оған жекпе-жек өткізуге рұқсат жоқ. Құрметпен қараймын, бірақ допинг қолданатындарды құрметтемеймін. Белбеуде “уақытша” деген жазуды көріп тұрсыз ба? Жоқ. Мен оны үйге алып кетемін, ұлым әкесінің әлем чемпионы екенін айта алады», — деді Дензел Бентли.
Айта кетейік, бұған дейін Жәнібек Әлімханұлы IBF тұжырымы бойынша чемпиондық белбеуінен айырылған. Ал WBO оны чемпион мәртебесінде қалдырғанымен, бір жылдық дисквалификация қолданған.