«Қайрат» Қазақстанға U-19 Чемпиондар лигасына жолдама сыйлады
KazFootball.kz
Шымкенттің «Ордабасы» U-19 командасы алғаш рет Жастар арасындағы Чемпиондар лигасы турнирінде бақ сынайды. Бұл мүмкіндік «Қайраттың» ересектер құрамасының Чемпиондар лигасының топтық кезеңіне шығуы арқасында пайда болды, деп хабарлайды Bassport.kz.
«Қайрат» U-19 командасы өз жасындағы Қазақстан чемпионы болып табылады. 2024 жылы QJ League додасын жеңіп, 2025/26 маусымындағы УЕФА Жастар арасындағы Чемпиондар лигасына алдын ала жолдама алған еді. Ал 26 тамыз күні алматылық клубтың негізгі құрамы Чемпиондар лигасының топтық кезеңіне шыққаннан кейін, елімізге қосымша квота берілді.
Осылайша, енді «Қайраттан» бөлек Шымкенттің «Ордабасы» U-19 командасы да құрлықтық додаға қатысады. Олар өткен маусымда QJ League-да 2-орын иеленген болатын.
Айта кетейік, Қазақстаннан екі команда бір маусымда Жастар арасындағы Чемпиондар лигасы турниріне шыққан соңғы жағдай 2015/16 маусымында тіркелді. Ол кезде «Ақтөбе» жасөспірімдер біріншілігінің чемпионы ретінде тікелей жолдама алған, ал «Астана» U-19 командасы ересектер құрамасының Чемпиондар лигасының топтық кезеңіне өтуі арқасында турнирге қосылған еді.