Месси іріктеудегі соңғы ойыны туралы астарлы мәлімдеме жасады
Футбол
FIFPro
«Интер Майами» шабуылшысы әрі Аргентина құрамасының капитаны Лионель Месси 2026 жылғы әлем чемпионатының іріктеу кезеңіндегі алдағы Венесуэлаға қарсы матчқа қатысты пікір білдірді, деп хабарлайды Bassport.kz.
Әйгілі футболшының айтуынша, Буэнос-Айрестегі бұл кездесу оның іріктеудегі соңғы үй матчы болуы мүмкін.
— Иә, бұл мен үшін өте ерекше ойын болады, себебі ол — іріктеудегі соңғы матч. Бұдан кейін жолдастық кездесулер бола ма, білмеймін. Бірақ бұл ерекше сәт, сол үшін жанымда отбасым болады: жұбайым, балаларым, ата-анам, тіпті әйелімнің туыстары да келеді. Одан кейін не болатынын білмеймін, бірақ біз осы көңіл-күймен алаңға шығамыз, — деді Месси.
Айта кетейік, футболшы әлем чемпионаты-2026 турниріне қатысуға қатысты соңғы шешімін әлі қабылдаған жоқ.
ӘЧ-2026 финалдық кезеңі 11 маусым мен 19 шілде аралығында Канада, Мексика және АҚШ-та өтеді. Алғаш рет біріншілікке 48 құрама қатыспақ.
Еске сала кетейік, Месси «Интер Майамиге» 2023 жылдың жазында қосылған. Оның клубпен келісімшарты 2025 жылдың соңына дейін жарамды.