«Реал» Алматыдағы «Қайратпен» өтетін ойынына қатысты пікір білдірді
Футбол
Offside.kz
Мадридтік «Реалдың» институционалдық қатынастар жөніндегі директоры Эмилио Бутрагеньо Чемпиондар лигасының жеребесі нәтижесінде Алматының «Қайратына» қарсы ойнайтындары жайлы пікір білдірді, деп хабарлайды Bassport.kz.
«Бұл біздің Қазақстанға алғаш рет сапарымыз болмақ. Бұған дейін «Қайратпен» ойнаған емеспіз. Әрине, бұл қашықтық жағынан алыс, әрі өте тығыз кестемізді ескергенде қосымша фактор болып тұр. Дегенмен біз мұны қабылдап, әрбір ойынға дайындалғандай мұқият дайындаламыз. Әрине, жеңіске үміт артамыз», — деді Бутрагеньо клубтық телеарнаға берген сұхбатында.
Оның айтуынша, «Реалдың» әр кездесуі маңызды және барлық қарсылас «корольдік клубқа» ерекше жігермен қарсы шығады. Сондықтан испандықтар барынша жоғары деңгейде ойнап, ұсақ-түйекке дейін назар аударуы тиіс.
Айта кетейік, «Қайрат» пен «Реал» арасындағы ойынның нақты күні әзірге жарияланған жоқ. Чемпиондар лигасының толық күнтізбесі осы апта соңына дейін белгілі болады.