Ливерпуль Барселонаның жұлдызына 100 миллион беруге дайын. Бірақ, ол Рафинья мен Ямал емес
vk.com
Рональд Араухоға 100 миллион еуро: «Ливерпуль» «Барселонаның» қорғаушысын өз сапына қосуды көздеп отыр.
Қазір футбол әлемінің назары Рафинья мен Ламин Ямальдың айналасындағы трансферлік қауесеттерге ауып жатқанда, «Ливерпуль» күтпеген қадам жасап отыр: ағылшындық клуб «Барселонаның» қорғаушысы Рональд Араухоға ресми ұсыныс жолдады, деп хабарлайды Bassport.kz Fichajes.net-ке сілтеме жасап.
Мерсисайдтықтар уругвайлық ойыншы үшін 100 миллион еуро көлемінде ұсыныс жасаған. Бұл сома «Барселона» үшін аз емес, әсіресе қазіргі қаржылық жағдайында.
Араухо каталондық клубтың қорғанысында көшбасшы ретінде танылып үлгерді. Ол – харизмасы, физикалық мықтылығы мен тұрақтылығымен ерекшеленетін, сенімді ойыншы. Оның мінезі мен алаңдағы тәртібі оны «Барса» қорғанысының тірегіне айналдырды. Мұндай ойыншылар – әрдайым алпауыт клубтардың назарында.
26 жастағы уругвайлық қорғаушы «Ливерпульдің» жаңа дәуіріндегі негізгі фигуралардың бірі бола алады. Клуб қазіргі уақытта Юрген Клопптың кетуімен байланысты өтпелі кезеңді бастан кешіріп жатыр. Сондықтан дәл қазір Араухо сынды сапалы қорғаушыны қосу – қорғанысты күшейтумен қатар, команданың жаңа құрылымының іргетасын қалауға сеп болады.
Экономикалық тұрғыда да жағдай екіұшты. «Барселона» Араухоны маңызды жоба ойыншысы ретінде қарастырғанымен, 100 миллион еуро көлеміндегі ұсыныс – елемеуге келмейтін сома. Клуб әлі де қаржылық қиындықтармен бетпе-бет, ал бұл трансфер бюджетті жақсартуға едәуір ықпал етуі мүмкін.
Өз кезегінде Рональд Араухо әзірге ешқандай алып-қашпа сөздерге себеп бермей, толықтай маусым соңына шоғырланған. Алайда АПЛ деңгейінде ойнау – кез келген футболшы үшін ерекше сын және өсу мүмкіндігі екені сөзсіз. «Ливерпульдің» қызығушылығы ойыншыға да жеткені анық.