Қазақстан мен Өзбекстан тағы бір рет қолғап түйістіреді – бокстан Әлем кубогының жартылай финалы
Olamsport.uz
Бразилияның Фос-ду-Игуасу қаласында өтіп жатқан бокстан Әлем кубогында 80 келіге дейінгі салмақ дәрежесінде өнер көрсететін қазақстандық Диас Молжігітовтің жартылай финалдағы қарсыласы анықталды.
Спортшымыз Өзбекстан құрамасының өкілі Жавохир Умматалиевпен қолғап түйістіреді. Өз кезегінде өзбек боксшысы ширек финалда америкалық Робби Гонсалесті 3:2 есебімен жеңіп, келесі кезеңге жолдама алды.
Бұл – Қазақстан мен Өзбекстан арасындағы осы турнирдегі екінші жартылай финалдық кездесу болмақ. Бұған дейін аса ауыр салмақта Данияр Сапарбай мен Жахонгир Зокиров та финалға жолдама үшін кездесетін болып шешілген.
Диас Молжігітов ширек финалда поляк Никодем Козакты айқын басымдықпен жеңген болатын.
Айта кетейік, Диас – 22 жасқа дейінгі Азия чемпионы және ересектер арасында құрлық біріншілігінің күміс жүлдегері. Оның қарсыласы Умматалиев – жастар арасындағы Азия чемпионатының күміс, сондай-ақ 2022 жылғы жастар арасындағы әлем чемпионатының алтын жүлдегері.