Әлем кубогының үшінші күні: Қазақстандық боксшылар қандай нәтиже көрсетті
Фос-ду-Игуасу (Бразилия) қаласында өтіп жатқан World Boxing ұйымының Әлем кубогы қызған шаққа таяды. Үшінші жарыс күні Қазақстан құрамасының төрт спортшысы шаршы алаңға шықты. Нәтижесінде 3 жеңіс тіркеліп, бір боксшы жарыс жолынан шығып қалды.
Ерлер арасында 55 келіде сынға түскен Нұрсұлтан Алтынбек франциялық Билал Беналиге еш мүмкіндік бермей, 5:0 есебімен жеңіске жетті. Алтынбектің техникалық әрі сенімді әрекеттері төрешілер тарапынан толық бағаланып, ол жарыстың келесі кезеңіне өтті.
80 келі салмақта ел намысын қорғаған Диас Молжігітов те өз қарсыласы — польшалық Никодем Козакты дәл осындай есеппен ұтты. Қарсыласына басынан-ақ қысым көрсеткен Диас айқын басымдықпен жеңіске жетіп, жартылай финалға жолдама алды.
70 келі салмақта өнер көрсеткен Дархан Дүйсебай франциялық Макан Траормен тартысты жекпе-жек өткізді. Алайда төрешілер шешімі бойынша 1:4 есебімен жеңіліп қалды.
Әйелдер арасында 51 келіде сынға түскен Жазира Орақбаева өз елінде өнер көрсеткен бразилиялық Каролин Алмедамен жұдырықтасты. Тартысты өткен кездесуде Жазира 3:2 есебімен жеңіске жетіп, жартылай финалға шықты.