«Тұран» командасы қатарынан екінші жеңісіне қол жеткізді
Түркістан облысы әкімінің баспасөз қызметі
Футболдан Қазақстан Премьер-лигасының кезекті тур ойындары өтті, деп хабарлайды Bassport.kz Түркістан облысы әкімінің баспасөз қызметіне сілтеме жасап.
Түркістан облысының намысын қорғайтын «Тұран» командасы «Түркістан Арена» стадионында Петропавлдың «Қызылжар» футболшыларын қабылдап, 1:0 есебімен жеңіске жетті. Тартысты ойынның 5-минутында тұрандық Никола Цукчич ойындағы жалғыз жеңіс голын соғып, әріптестерін алға шығарды. Ойынның қалған бөлігі алма-кезек шабуылдармен өрбігенімен, есеп өзгермеді. Осылайша, «Тұран» командасы 21 тур аясында өткен кездесуде 3 ұпайды еншілеп, турнир кестесінде жағдайларын біршама жақсартып алды. Олар 19 ұпаймен 11-орында келеді.
«Тұранның» қатарынан 2 рет жеңіске жетуіне «Түркістан Арена» стадионына оралуы да өз әсерін тигізді. Екі ойында да стадионда жанкүйерлер қатары қалың болып, футболшыларға шабыт сыйлай білді.
Тағы бір айта кетерлігі, ойыннан кейін Түркістан облыстық қоғамдық даму басқармасының «Жастар ресурстық орталығы» КММ-нің үйлестіруімен Түркістанның белсенді жастары стадионда тазалық жұмыстарын жүргізіп, көпшілікке үлгі көрсете білді.
Енді «Тұран» аяқдоп шеберлері 27 қыркүйек күні Шымкентте «Ордабасы» командасымен кездеседі.