Алматыда «AUYL SPORT-2024» республикалық лигасының ашылу салтанаты өтті
Әлеуметтік желі
Бүгін Алматы қаласындағы «Достық» спорт кешенінде 1300-ден астам ауыл баласының қатысуымен «AUYL SPORT-2024» республикалық лиганың ашылу салтанаты өтті.
Іс-шараны «Халық» қайырымдылық қоры ұйымдастырып, қаржыландырды.
Бұл жоба ауыл балалары мен жасөспірімдерді спортқа тарту, олардың денсаулығын нығайту және қабілеттерін дамыту, бұқаралық спортты кеңінен насихаттау, сонымен қатар ауыл жаттықтырушыларының біліктілігін арттыруды мақсат етеді.
Қазан-желтоқсан айларында елдің 17 өңірінде ауыл спортшылары арасында өңірлік лигалар өтті, оған 200-ден астам ауылдан 7000-ға жуық жасөспірім қатысты. Енді республикалық турнирде бокс, күрес, каратэ, баскетбол, волейбол және шахмат бойынша үздіктер анықталады.
Спорттық жарыстарға 2010-2012 жылы туған балалар еркін күрес және бокс бойынша 6 салмақ дәрежесінде, 2009-2011 жылы туған ұлдар мен қыздар баскетбол және волейбол бойынша екі санатта, ал шахматтан 10 және 14 жасқа дейінгі жасөспірімдер 4 санатта қатысады.
Өңірлік кезеңдерде жеңіске жеткен спортшылар «Халық» қорының арнайы дипломдары мен сыйлықтарына, спорттық формалары мен құрал-жабдықтарына ие болды. Сонымен қатар, республикалық турнирге келген 1300-ден астам қатысушының жол шығындары, тамақтануы және тұруы қордың есебінен қамтамасыз етілді.
Турнир жеңімпаздарына дипломдар, кубоктар және ақшалай сыйақылар табысталады деп жоспарлануда.
Турнирдің маңызды сәттерін «Спорт+ Qazaqstan» телеарнасының тікелей эфирінен тамашалаңыз!