«Қайрат» Чемпиондар лигасының плей-офф кезеңінде сенсация жасады
Спорт-Экспресс
Алматының «Қайраты» Чемпиондар лигасының плей-офф кезеңіндегі алғашқы ойынында сырт алаңда Шотландияның «Селтигімен» тең түсті, деп хабарлайды Bassport.kz.
Кездесу Глазгодағы «Селтик Парк» стадионында өтіп, оны норвегиялық төреші Эспен Эскос басқарды. Сарапшылар мен букмекерлердің болжамы бойынша айқын фаворит алаң иелері саналған еді.
Құрамдар:
• «Селтик»: Шмейхель, Джонстон, Скейлз, Нюгрен, Айда, Картер-Викерс, Маэда, Хататэ, Макгрегор, Форрест, Тирни.
• «Қайрат»: Заруцкий, Глэйзер, Мартынович, Сорокин, Мрынский, Арад, Громыко, Тапалов, Эдмилсон, Жоржиньо, Сатпаев.
Алғашқы таймда екі команда да қарқынды ойын көрсетті, алайда қауіпті сәттерді көбірек жасаған — қазақстандықтар. Александр Мартынович гол соққанымен, ол офсайдқа байланысты есепке алынбады.
Екінші таймда «Селтик» шабуылды күшейтті. Джеймс Форрест қақпа бағанын көздеп үлгерді, бірақ шотландтардың қысымы нәтижесіз аяқталды. Қақпашы Александр Заруцкий жарақат алғаннан кейін оның орнын Темірлан Анарбеков басты. Жас голкипер сенімді ойнап, қақпасын «құрғақ» сақтап қалды — 0:0.
Қарымта матч 26 тамыз күні Алматыда өтеді.