Төрехан Сабырхан қарсыласын нокаутпен жеңіп, шоу жасады (ВИДЕО)
Айдос Балтабай
Қазақстандық боксшы Төрехан Сабырхан кәсіпқой рингтегі алғашқы жекпе-жегін өткізіп, жарқын жеңіске жетті, деп хабарлайды Bassport.kz.
Астанада өткен бокс кешінде ол чехиялық боксшы Иржи Хауке (4-6, 2 KO) қарсыласымен қолғап түйістірді. Жартылай орта салмақтағы бұл кездесу алты раундқа жоспарланғанымен, үшінші раундта-ақ аяқталды. Сабырхан қарсыласын нокаутқа жіберіп, кәсіпқой мансабын сенімді жеңіспен бастады. Бұған дейін ол Хаукені нокдаунға жіберіп, рингте толық үстемдік көрсеткен еді.
Төрехан жекпе-жек барысында өзінің жоғары техникасын танытып, қарсыласынан айқын басым болды. Осылайша, ол кәсіпқой бокстағы жолын жеңіспен бастаса, Хауке мансабындағы жетінші жеңілісіне ұшырады.
Айта кетейік, Төрехан Сабырхан әуесқой бокста тарихи жетістікке жеткен спортшы. Ол – жасөспірімдер мен жастар арасында Азияның төрт дүркін чемпионы атанған алғашқы боксшы.
Астана төріндегі бұл кештің басты жекпе-жегінде қазақстандық Жәнібек Әлімханұлы (16-0, 11 KO) мен француз Анауэль Нгамиссенге (14-0, 9 KO) шаршы алаңға шығады.