Қазақстан мен Өзбекстан тағы да финалда кездеседі
ҰОК
Бразилияның Фос-ду-Игуасу қаласында өтіп жатқан әуесқой бокстан World Boxing ұйымы ұйымдастырған Әлем кубогының алғашқы кезеңінде Қазақстан мен Өзбекстан құрамалары арасындағы тағы бір жекпе-жек өтеді. Бұл туралы Bassport.kz хабарлайды.
Турнирдің бесінші жарыс күнінде 85 келі салмақта Өзбекстанның өкілі Акмалжон Исроилов шаршы алаңға шықты. Ол жартылай финалда польшалық Якуб Страшевскимен кездесіп, үш раунд бойы толық үстемдік көрсетіп, төрешілердің бірауызды шешімімен (5:0) жеңіске жетті.
Осылайша, Исроилов финалға жолдама алып, Қазақстанның боксшысы Даулет Төлемісовпен шешуші жекпе-жекте кездесетін болды.
Айта кетейік, бокстан Әлем кубогының алғашқы кезеңі 6 сәуірде аяқталады. Екінші кезең 30 маусым мен 7 шілде аралығында Қазақстанда өтсе, финалдық кезең Үндістанда ұйымдастырылады.