Әлем кубогының финалы үшін өткен жекпе-жектерде Қазақстан қалай өнер көрсетті
ҚБФ
4 сәуірден 5 сәуірге қараған түні Бразилияның Фос-ду-Игуасу қаласында бокстан World Boxing ұйымы өткізген Әлем кубогының жартылай финалдық кездесулері өтті. Бұл туралы Bassport.kz хабарлайды.
Қазақстан құрамасынан бес боксшы финал жолдамасы үшін шаршы алаңға шықты. Олардың үшеуі жеңіске жетіп, шешуші кезеңге жолдама алды.
Әйелдер арасында 51 келіге дейінгі салмақта Жазира Орақбаева польшалық Наталия Кучевскаяны 3:2 есебімен жеңіп, финалға өтті.
Ал 57 келіде өнер көрсеткен Ұлжан Сарсенбек польшалық Юлия Шереметадан жеңіліп қалды — 0:5.
Ерлер арасында 55 келіде Нұрсұлтан Алтынбек үндістандық Маниш Ратхореден 5:0 есебімен басым түсіп, сенімді жеңіске қол жеткізді.
80 келі салмақта Диас Молжігітов өзбекстандық Джавохир Умматалиевпен өткен көрші елдердің дербиінде 0:5 есебімен жеңіліп қалды.
Ал 85 келі салмақта Даулет Төлемісов француз Абдулайе Траорені екінші раундта нокаутпен жеңіп, жарқын жеңіске қол жеткізді.
Финал жолдамасына ие болған үш боксшымыз ел намысын шешуші кезеңде қорғайды.