Финал жолындағы жекпе-жектер: Әлем кубогының бесінші күнінде кімдер шаршы алаңға шығады
ҚБФ
Астана уақыты бойынша 4 сәуірден 5 сәуірге қараған түні Бразилияның Фос-ду-Игуасу қаласында бокстан World Boxing ұйымы ұйымдастырған Әлем кубогының бесінші күні өтеді. Бұл туралы Bassport.kz хабарлайды.
Кешкі сессия түнгі сағат 02:00-де басталады. Онда жартылай финалдық жекпе-жектер өтеді. Финал жолдамасына Қазақстанның бес боксшысы таласады.
Әйелдер арасындағы алғашқы жекпе-жекте 51 келіде Жазира Орақбаева польшалық Наталия Кучевскаямен кездеседі. Үшінші жұпта 57 келіде Ұлжан Сарсенбек польшалық Юлия Шереметамен рингке шығады.
Ерлер арасында 55 келі салмақта Нұрсұлтан Алтынбек үндістандық Маниш Ратхормен жұдырықтасады. Бұл кездесудің реттік саны – бесінші.
Күннің тоғызыншы жекпе-жегі Қазақстан мен Өзбекстан дуэліне айналады. 80 келіде Диас Молжігітов өзбекстандық Джавохир Умматалиевпен қолғап түйістіреді.
Ал 85 келі салмақтағы соңғы жекпе-жектердің бірінде Даулет Төлемісов француз Абдулайе Траоремен финал жолдамасын сарапқа салады.