Қазақ боксының батыры: Бекзат Саттарханов бүгін 45 жасқа толар еді
ҰОК
4 сәуір – қазақ спорты үшін ерекше күн. Дәл осы күні, 1980 жылы Түркістан қаласында Олимпиада чемпионы Бекзат Саттарханов дүниеге келген. Егер тірі болғанда, бүгін қазақ боксының жарық жұлдызы 45 жасқа толар еді.
Bassport.kz Бекзат Саттархановтың қысқа да жарқын өмір жолын еске түсіреді.
Бекзат боксқа ерте емес – 15 жасында келген. Алайда аз уақыттың ішінде-ақ үлкен жетістіктерге жетіп үлгерді. 18 жасында Азия жасөспірімдер чемпионаты мен 1998 жылғы әлем чемпионатының күміс жүлдегері атанды. 19 жасында Орта Азия чемпионатының күмісін, ал кейін Азия чемпионы атағын иеленді.
2000 жыл – Бекзат үшін нағыз жұлдызды кезең болды. Алдымен халықаралық Гран-при кубогының жеңімпазы атанды, артынша барша қазақты қуантқан тарихи жеңіс – Сидней Олимпиадасындағы алтын медаль. Ол небәрі 20 жасында Олимпиада чемпионы атанып, әлемді таңғалдырды. Сарапшылар Бекзатты “қазақстандық бокстың сенсациялық ашылуы” деп бағалады.
Алайда, тағдыр оған ұзақ өмір сыйламады. Жаңа 2001 жылға 15 минут қалғанда, Саттарханов жол апатынан көз жұмды. Қайғылы оқиға Оңтүстік Қазақстан облысы, Ордабасы ауданының Шұбарбұлақ ауылы маңында орын алды. Ол Түркістаннан Шымкентке бара жатқан.
Бекзат Саттарханов – қазақ спортының символына айналған есім. Ол әрқашан халық жүрегінде жас күйінде қала береді.