Қазақстан құрамасы бүкіләлемдік гимназиадаға аттанды
ҚР Оқу-ағарту министрлігі
4–14 сәуір күндері Сербияның Златибор қаласында өтетін ISF U-15 бүкіләлемдік мектеп спорт ойындарына Қазақстанның жасөспірімдер құрамасы қатысады.
Бұл – 13 пен 18 жас аралығындағы оқушыларға арналған ең ірі халықаралық көпсалалы турнир. Биылғы бәсекеге 70-тен астам елдің өкілдері жиналып, 25 спорт түрінен жүлделерді сарапқа салады.
Қазақстан сапында 22 спортшы бар. Олар дзюдо, еркін күрес, бокс және шахмат бойынша ел намысын қорғайды. Құрамаға республикалық деңгейде топ жарған, қатаң іріктеуден өткен және жоғары дайындық көрсеткен спортшылар енген.
Құрамда Аманжол Әбжали, Ерасыл Қалмағанбет, Аю Қымбат, Серікқали Бақдәулет, Ануарбек Айбар, Ақылбай Мансұр, Бақыт Әлібек, Арашов Висхан, Нұрболат Әмір, Смағұл Әлихан, Нұрқожа Қалыбек, Нұртас Бисенбай, Мейрамбек Балтабек, Ескенов Аруен, Дулатов Нұрислам, Макаров Шыңғыс, Әлімбай Нұртас, Садық Айбек, Молдабай Әлихан, Орынтайқызы Айя, Жанат Нұрым және Алғаппарова Олтинай бар.
Айта кетейік, ISF гимназиадасы алғаш рет 1974 жылы өткен. Қазақстан бұл жарысқа 2022 жылдан бері қатысып келеді. Өткен жылы ұлттық құрама 6 алтын, 3 күміс және 5 қола медаль иеленген болатын.