Қазақстан боксы Әлем кубогының екінші күнінде сәтсіздікке ұшырады
ҚБФ
Бразилияның Фос-ду-Игуасу қаласында өтіп жатқан World Boxing Әлем кубогының екінші жарыс күнінде қазақстандық боксшылар күтпеген жеңілістерге тап болды, деп хабарлайды Bassport.kz.
1 сәуір күні рингке шыққан бес боксшының төртеуі жарысты жеңіліспен аяқтады.
Әйелдер арасында 54 келіде сынға түскен Анита Адишева нокдаунға түсіп, поляк Виктория Рогалиньскаға 0:5 есебімен жол берді. Ерлер арасындағы дәл осы салмақта Талғат Сырымбетов 1/4 финалда бразилиялық Луис Оливейраға қарсы нокдаун алып, сондай-ақ 0:5 есебімен жеңілді.
50 келідегі Нұрзат Оңғаров өзбекстандық Асилбек Жалиловпен өткен кездесуде айқын басымдықпен жеңіліп қалды. Ал Алмат Абдуәли (65 кг) 1/8 финалда жергілікті Юри Рейс Фалькаодан 0:5 есебімен жеңілді.
Осылайша, Қазақстан сапынан жалғыз жеңіске жеткен боксшы — Даниял Сапарбай болды. Ол 1/4 финалда үндістандық Нарендерді 3:2 есебімен ұтып, келесі кезеңге өтті.
Еске сала кетейік, бұл турнирде Қазақстанның ерлер құрамасы сегіз, ал әйелдер құрамасы үш салмақта бақ сынауда.