Қазақ боксшылары үндістандық актерлармен бокстасқан (ВИДЕО)
ҚБФ
Танымал кәсіпқой боксшы Мадияр Ашкеев Алматыда өткен бокс кешін сынға алды, деп хабарлайды Bassport.kz.
«Кеше Алматыда өткен турнир туралы бәрі менің пікірімді сұрап жатыр. Әр нәрсе шынайы және әділ болуы керек. Бұрын кәсіпқой боксшыларды “таксисттермен” жұдырықтасады деп мазақ етуші еді, енді актерлерді, әсіресе үндістандық актерлерді әкеліп жатыр. Осыны бақылайтын адам бар ма?
Мұндай істерді матчмейкер мен менеджер қадағалауы тиіс. Промоутер тек шоу жасап, ақша санап отыр делік. Ал матчмейкерлер, сіздер қарсыластарды қарап, сапасын бағалауға міндеттісіздер. Бокс жанкүйерлері билет сатып алды, ал сапасыз жекпе-жекті тамашалағаны өкінішті.
Біз болашақта боксқа арналған платформа құрып, ақылы трансляциялар ұйымдастырамыз деп айтамыз. Бірақ мұндай деңгейдегі боксқа қарап, ол тек арман болып қалатын сияқты. Егер осындай шоулар жалғаса берсе, ең болмағанда қарсыластардың деңгейін теңестіруге тырысу керек.
Сондай-ақ, біздің боксшыларға да айтарым бар. Егер сіздерге лайықсыз қарсылас ұсынса, батылдық танытып: «Мен мұнымен шықпаймын. Оның рекорды қандай?» деп сұраңыздар», – деді Мадияр Ашкеев.