Футзалдан Чемпиондар лигасының финалы 2025 жылы Францияда өтеді
Футзал
UEFA.com
УЕФА Атқару комитетінің шешімі бойынша, 2025 жылғы футзалдан Чемпиондар лигасының финалдық кезеңі Францияның Ле-Ман қаласындағы «Антарес» аренасында өтеді. Турнир 2-4 мамыр аралығына жоспарланған, деп хабарлайды BasSport.kz UEFA.com сайтына сілтеме жасап.
Биылғы жарысқа қазіргі чемпион «Пальма», екі дүркін жеңімпаз «Спортинг» пен «Қайрат», сондай-ақ дебютант «Картахена» қатысады. Ал финалдық кезеңнің ресми иесі болып француздық «Этуаль» клубы таңдалды.
Финалға арналған жеребе тарту рәсімінің уақыты мен өтетін орны кейінірек белгілі болады.
Айта кетейік, «Антарес» аренасы 1995 жылы ашылған және 5785 көрерменге арналған. Бұл – Францияда өтетін футзалдан Чемпиондар лигасының алғашқы финалдық турнирі болмақ.