“Астана” командасы Алексей Луценкомен ресми қоштасты
“Астана” велокомандасы
“Астана” велокомандасы Алексей Луценконың командадан кететіні туралы ресми мәлімдеп, оның он жылдан астам уақыт бойы қосқан үлесі үшін алғыс білдірді.
31 жастағы қазақстандық велошабандоз енді проконтинентальды Israel - Premier Tech командасының намысын қорғайды. Жаңа келісімшарт 2026 жылдың соңына дейін жасалған.
Луценко “Астана” сапында 2013 жылдан бері өнер көрсетіп, 43 жеңіске жетті. Оның ішінде Тур де Франс пен Вуэльта Испания кезеңдеріндегі жеңістері, Омандағы веложарыстың екі дүркін жеңісі, Алматы Турының үш дүркін чемпионы атағы, сондай-ақ Түркия Туры, Сицилия Джиросы, д’Абруццо Джиросы, Норвегия Арктикалық жарысы және Хайнань Туры сынды беделді жарыстардағы жетістіктері бар.
“Астана” командасы Луценкоға алдағы мансабында сәттілік тілеп, оның команда тарихындағы ерекше рөлін атап өтті.