Головкин Панама ҰОК президенті Дамарис Янг Арандамен кездесті
ҰОК
Қазақстан Ұлттық Олимпиадалық комитетінің президенті Геннадий Головкин Панама ҰОК басшысы, Халықаралық Олимпиадалық комитетінің (ХОК) әрі Дүниежүзілік допингке қарсы агенттіктің (WADA) құрылтайшылар кеңесінің мүшесі Дамарис Янг Арандамен кездесті, деп хабарлайды Bassport.kz ҰОК-ге сілтеме жасап.
Тараптар екіжақты ынтымақтастықты дамыту, спортты басқару саласында тәжірибе алмасу және бірлескен бастамаларды жүзеге асыру мәселелерін талқылады.
Дамарис Янг Аранда Панамада Олимпиадалық қозғалыстың дамуы туралы айтып, Ұлттық Олимпиадалық комитеттің екі бағыттағы стратегиялық жоспарын таныстырды. Олар - спортшылардың қауіпсіздігі мен әл-ауқатын қамтамасыз ету (safeguarding) және спорт ұйымдарын басқару жүйесін жетілдіру (good governance). Сонымен қатар Панама өткізуді жоспарлап отырған жасөспірімдер арасындағы Панамерикалық ойындарға дайындық барысы сөз болды.
Қазақстан тарапы еліміздегі спортты дамытудың негізгі бағыттары, алдағы жоспарлар мен халықаралық жарыстар туралы баяндады. Атап айтқанда, Астанада Дүниежүзілік допингке қарсы агенттіктің конгресін өткізу және 2027 жылға жоспарланған әлем чемпионаттары сөз болды. Геннадий Головкин Дамарис Янг Аранданы конгресс кезінде Қазақстанға келуге шақырды. Кездесу соңында тараптар екіжақты ынтымақтастықты одан әрі дамытуға, тәжірибе алмасуға және Ұлттық Олимпиадалық комитеттердің түрлі бағыттағы өзара байланысын нығайтуға ниетті екенін білдірді.