Дэвис кубогы: Бублик Таиландпен өтетін ойынға қатыспайды
ҚТФ
Теннистен Қазақстан ерлер құрамасы Таиландпен өтетін Дэвис кубогының екінші әлемдік тобы аясындағы матчқа қатысатын ойыншылар тізімін жариялады, деп хабарлайды Bassport.kz.
Кездесу 18-19 қыркүйек күндері Астанада өтеді. Матчтар елордадағы Ұлттық теннис орталығының «Beeline Arena» хард корттарында ұйымдастырылады.
Екі күнге созылатын бәсекеде барлығы бес кездесу – төрт жекелей және бір жұптық матч өтеді.
Қазақстан сапында бес теннисші өнер көрсетеді: Александр Шевченко; Денис Евсеев; Тимофей Скатов; Бейбіт Жұқаев; Әмір Омарханов.
Құрама капитаны – Диас Досқараев.
Ал Таиланд құрамасының сапына Pawit Sornlaksup, Thanapet Chanta, Maximus Parapol Jones, Kasidit Samrej және Pruchya Isaro енді. Команда капитаны – Thanakorn Srichaphan. Қазақстанның бірінші ракеткасы Александр Бублик бұл жолы ұлттық құрама сапында өнер көрсетпейді.
Қазақстан – Таиланд кездесуі 18-19 қыркүйекте өтеді.
18 қыркүйекте екі жекелей матч ойналады. Ойын күні Астана уақытымен сағат 13:00-де басталады.
19 қыркүйекте алдымен жұптық кездесу өтіп, одан кейін тағы екі жекелей матч ұйымдастырылады. Екінші ойын күнінің басталуы – сағат 12:00.
Қарсыластықтың жеңімпазы 2027 жылғы Дэвис кубогының Бірінші әлемдік тобының плей-офф кезеңіне жолдама алады.
Қазіргі Дэвис кубогы рейтингінде Қазақстан құрамасы 42-орында тұр. Таиланд құрамасы 60-сатыға орналасқан.