«Қайрат» қарымта матчта «Левскиден» жеңіліп, Чемпиондар лигасындағы жорығын аяқтады

Түркістан қаласындағы «Түркістан Арена» стадионында алматылық «Қайрат» футболдан UEFA Чемпиондар лигасының үшінші іріктеу кезеңі аясында «Левски» (София, Болгария) командасымен қарымта кездесу өткізді, деп хабарлайды Bassport.kz ҚазАқпаратқа сілтеме жасап. 

Алғашқы ойында алматылық команда қарсыласына 0:1 есебімен есе жіберген болатын. Сондықтан «Қайрат» қарымта матчта есепті теңестіруге ұмтылып, ойынның алғашқы минуттарынан белсенділік танытты. Бірнеше қауіпті шабуыл ұйымдастырғанымен, қарсылас қақпасынан саңылау таба алмады. Алайда қонақтар да қарап қалмай, шабуылды үдетіп, «Қайрат» қақпасына қысым жасай бастады. Көп ұзамай 13-минутта «Левски» есеп ашты. Болгариялық клубтың шабуылшысы Рейналдо мүмкіндікті мүлт жібермей, алматылықтардың қақпасына дәл соққы бағыттады. Бірінші таймның қалған бөлігінде «Қайрат» есепті теңестіруге тырысқанымен, «Левски» қорғанысы сыр бермеді. Екінші таймда алматылықтар шабуылды күшейтіп, қарсылас қақпасына бірнеше рет қауіп төндірді. Алайда «Левски» ойыншылары қорғаныста сауатты қимылдап, «Қайрат» шабуылшыларына гол салуға мүмкіндік бермеді. Нәтижесінде «Қайрат» қарымта кездесуде де 0:1 есебімен жеңіліп, екі ойынның қорытындысы бойынша 0:2 есебімен «Левскиге» жол берді. Осылайша алматылық клуб UEFA Чемпиондар лигасындағы жорығын үшінші іріктеу кезеңінде аяқтады.