Қазақстандық балуан алғашқы белдесуде сүрінді
Загребте (Хорватия) өтіп жатқан күрестен әлем чемпионатында қазақстандық балуан, Олимпиада қатысушысы Әлішер Ерғали күтпеген жеңіліске ұшырады.
125 келі салмақтағы іріктеу белдесуінде ол Болгария атынан өнер көрсетіп жүрген ресейлік легионер Ален Хубуловпен кездесті. Белдесудің алғашқы бөлігінде есеп 4:4 болып тең түсті. Алайда шешуші сәтте Хубуловтың жасаған әдісіне төрешілер бірден 4 ұпай берді.
Қазақстан құрамасының жаттықтырушылары бұл шешімге қарсылық білдіріп, челлендж жасады, бірақ нәтиже өзгерген жоқ. Айқын басымдыққа ие болған болгариялық спортшы кездесуді өз пайдасына аяқтап, Ерғали жарыстан ерте шығып қалды.
Айта кетейік, Әлішер Ерғали — Токио Олимпиадасының қатысушысы әрі Азия чемпионаттарының жүлдегері. Ал Қазақстан құрамасы бұл салмақта тағы бірнеше балуанмен сынға түсуде. Бұған дейін Азамат Дәулетбеков пен Асылжан Есенгелді жеңіс жолын жалғастырған болатын.