US Open кезінде румын теннисшісінің трофейі қонақ үйден ұрланды
Теннис
GoTennis.ru
Румыниялық теннисші Сорана Кырстя (WTA рейтингінде №71) Нью-Йорктегі қонақ үй нөмірінен чемпиондық трофейінің ұрланғанын мәлімдеді, деп хабарлайды Bassport.kz.
35 жастағы спортшы бұл жайында әлеуметтік желідегі парақшасында айтып, ұрыға ерекше өтініш жасады:
«Кливлендтен жеңіп алған трофейімді Нью-Йорктегі Fifty Sonesta қонақүйінің 314-нөмірінен ұрлап кетті. Өтінемін, маған қайтарыңыз! Оның материалдық құндылығы жоқ, тек мен үшін үлкен маңызға ие. Өте қатты ризашылығымды білдірер едім», – деп жазды Кырстя.
Айта кетейік, Кырстя өткен аптада WTA 250 турнирінде Кливлендте топ жарған болатын. Бұл – оның жеке разрядтағы мансабындағы үшінші ірі жеңісі. Ал US Open жарысында румын спортшысы екінші кезеңге дейін жетті, ал жұптық сында алғашқы айналымнан шығып қалды.
Кырстя 2006 жылдан бері WTA турнирлерінде өнер көрсетіп келеді.