Туринде ХХХІІ Қысқы Дүниежүзілік Универсиада басталады
wugtorino2025.com
2025 жылдың 13 қаңтарында Италияның Турин қаласында ХХХІІ Қысқы Дүниежүзілік Универсиада басталып, 23 қаңтарға дейін жалғасады.
Әлемнің 57 елінен жиналған 2000-ға жуық спортшы 11 спорт түрі бойынша 96 медаль жиынтығын сарапқа салады. Биылғы Универсиаданың ерекшелігі – алғаш рет бағдарламаға пара тау шаңғысы және пара шаңғы жарыстары енгізілді.
Қазақстан намысын бұл беделді додада ұлттық және жастар құрамаларының қатарынан 103 спортшы қорғайды. Қатысушыларды іріктеу жұмыстарын ҚР Оқу-ағарту министрлігінің «Ұлттық ғылыми-практикалық дене шынықтыру орталығы» жүргізді.
FISU ережелеріне сәйкес, Универсиадаға қатысушылар 17-25 жас аралығында болуы, жарысатын елдің азаматтығын алуы және жоғары оқу орнында білім алуы тиіс.
Қазақстан құрамасы бұған дейінгі ең жоғары нәтижесіне 2017 жылы Алматыда өткен Универсиадада қол жеткізген еді. Сол кезде ел спортшылары 11 алтын, 8 күміс және 17 қола медаль жеңіп алып, жалпы есепте екінші орынға тұрақтаған. Жеңімпаздар қатарында шаңғышылар Иван Люфт, Анна Шевченко, биатлоншылар Галина Вишневская, Роман Еремин, фристайл могулдан Юлия Галышева, Павел Колмаков және шорт-трекшілер Денис Никиша мен Анита Ногай сынды спортшылар болды.