BasSport.kz AWARDS – 2024: Жыл үздіктері анықталды!
Құрметті спорт жанкүйерлері! BasSport.kz AWARDS – 2024 жобасының дауыс беру кезеңі аяқталды.
Сіздердің қолдауларыңызбен биылғы жылдың үздіктері анықталды. Бұл спортшылар мен командалар 2024 жылғы қазақстандық спорттағы ең үлкен жетістіктерімен ел есінде қалды.
Жылдың үздік спортшысы
Нұрбек Оралбай – 81 кг салмақта бокстан Олимпиада күміс жүлдегері, ол 43% дауыс жинап, үздік атанды.
Жылдың үздік командасы
Футзалдан Қазақстан құрамасы – Әлем чемпионатының ширек финалына шығып, қазақстандық футзал тарихындағы маңызды кезеңді белгіледі. Команда 67% дауыс жинап, өз деңгейін тағы да дәлелдеді.
Жылдың үздік бапкері
Нұрбол Сүлейменов – Дзюдодан Қазақстан құрамасының бас бапкері. Оның жетекшілігімен команда Париж Олимпиадасында бір алтын және бір қола медаль жеңіп алды. Нұрбол 34% дауыс жинады.
Жылдың үздік спортшысы (әйелдер)
Нұрила Асанқызы – Қазақстан тарихындағы алғашқы жекпе-жек самбосынан әлем чемпионы. Нұрила 45% дауыс жинап, жанкүйерлердің сеніміне ие болды.
Жыл жаңалығы
Александра Ле мен Ислам Сатпаев – Париж Олимпиадасында пневматикалық винтовкадан жұптық кездесуде қола медаль иегерлері. Олар 45% дауыс жинап, қазақ спортындағы жаңашылдықтың символына айналды.
Жылдың үздік пара спортшысы
Ақмарал Науатбек – Дзюдодан Паралимпиада чемпионы, 70% дауыс жинап, сенімді жеңіске жетті. Ақмаралдың жетістігі – Қазақстандағы паралимпиадалық спорттың биік деңгейін көрсететін нәтиже.
BasSport.kz AWARDS – 2024 жеңімпаздарын шын жүректен құттықтаймыз! Бұл марапаттар олардың қажырлы еңбегі мен жанкүйерлердің қолдауының жемісі. Біз үздіктердің алдағы жарыстарда да елімізді биік деңгейде танытатынына сенімдіміз.