Қысқы Дүниежүзілік Универсиада туралы не белгілі?
WUG Torino
2025 жылдың 13 қаңтарында Италияның Турин қаласында Қысқы Дүниежүзілік Универсиада басталады.
23 қаңтарға дейін жалғасатын жарыстарда 11 спорт түрі бойынша 96 медаль жиынтығы сарапқа салынады. Бағдарламаға биатлон, тау шаңғысы, кёрлинг, шаңғы жарысы, сноуборд, мәнерлеп сырғанау, фристайл, шайбалы хоккей, шорт-трек, шаңғы бағдарлау және ски-альпинизм сияқты спорт түрлері кіреді.
Қысқы Универсиаданы өткізу құқығы үшін Туринмен бірге Швейцарияның Люцерн және Швецияның Стокгольм қалалары таласқан болатын. Алайда FISU (Халықаралық студенттік спорт федерациясы) байқағандай, Турин осындай ауқымды жарыстарды ұйымдастыруда бай тәжірибеге ие. Қала бұған дейін 1959 және 1970 жылдары жазғы Универсиаданы, 2007 жылы қысқы Универсиаданы, сондай-ақ 2006 жылы Қысқы Олимпиада мен Паралимпиаданы қабылдаған.
2025 жылғы Универсиада тарихта алғаш рет параспортшылардың қатысуымен ерекшеленеді. Олар тау шаңғысы мен шаңғы жарысында өз шеберліктерін көрсетеді. Бұл қадам спорттың инклюзивтілігін айқындай түсіп, “спорт баршаға ортақ” деген ұстанымды қолдайды.
Жарыстар тек Туринде ғана емес, Пьемонт аймағының әсем жерлерінде де өтеді:
Турин: ашылу салтанаты Inalpi Arena-да, жабылу салтанаты Piazza Castello-да өтеді. Сондай-ақ, мұз айдынында мәнерлеп сырғанау мен шорт-трек жарыстары ұйымдастырылады.
Бардонеккия: тау шаңғысы, сноуборд және фристайл жарыстары.
Пинероло: хоккей жарыстары.
Прагелато: биатлон, шаңғы жарысы және шаңғы бағдарлауы.
Сестриере: шаңғы альпинизмі жарыстары.
Торре Пелличе: хоккей жарыстары.