Сайрамдық спортшылар әлем чемпионатында 4 медаль еншіледі
Түркістан облысының Өңірлік коммуникациялар қызметі
Сайрам ауданының спортшылары Венгрия елінің астанасы Будапешт қаласында кикбоксингтен өткен әлем чемпионатында 2 алтын, 2 қола еншіледі. Бұл туралы Bassport.kz Түркістан облысының Өңірлік коммуникациялар қызметіне сілтеме жасап хабарлайды.
Атап айтқанда, Бақытжан Серікбаев пен Музаффарбек Каримов қарсылас шақ келтірмей алтын медаль алса, Әбдіқадыр Ырысқұлов пен Әлімжан Мадикаримов ІІІ орынға ие болды. Аймақ абыройын асырған спортшыларды аудандық мәдениет және өнер, тілдерді дамыту және спорт, денешынықтыру бөлімінің басшысы Дәулет Алашбаев арнайы құттықтап, аудан әкімінің Алғыс хатын табыс етті.
Бұл спортшыларымыз бұған дейін бірқатар жеңіс белесін бағындырған. Музаффарбек Каримов – кикбоксингтен ел чемпионы, Азия чемпионы, Әлем кубогінде II орынға ие болған. Әлімжан Мадикаримов да Қазақстан және Азия чемпионы.