Президент кубогы: Қазақстан олимпиадалық құрамасы финалда «Ладамен» ойнайды
Виктор Федюнин / Kazinform
Шайбалы хоккейден ҚР Президенті кубогы финалында Қазақстан олимпиадалық құрамасы мен Ресейдің «Лада» (Тольятти) командалары сынға түседі, деп хабарлайды Bassport.kz ҚазАқпаратқа сілтеме жасап.
17 тамызда қазақстандық хоккейшілер Ресейдің «Амур» командасын 3:1 есебімен тізе бүктірді. Ел құрамасынан Михаил Рахманов, Андрей Буяльский и Кирилл Панюков мергендік танытса, оған ресейлік клубтан Александр Брынцев бір голмен жауап қайырды. Ал елордалық «Барыс» «Лада» клубына 3:4 есебімен есе жіберді.
Нәтижесінде «Лада» 6, Қазақстан олимпиадалық құрамасы 4, «Барыс» 3 ұпай жинаса, «Амур» бірде-бір ұпайға ие бола алған жоқ. Енді финалда 18 тамызда Қазақстан олимпиадалық құрамасы мен Ресейдің «Лада», 3-орын үшін «Барыс» пен «Амур» кездеседі.
Қазақстандық хоккейшілер финалдық олимпиадалық іріктеу ойындарында Словакияның Братислава қаласында 29 тамыз-1 қыркүйек аралығында Австрия, Венгрия және Словакия құрамаларымен ойнайды.
Ал бұдан кейін 20-25 тамыз аралығында Ресейдің Омбы қаласында өтетін «Блинов Кубогы» маусымалды турнирінде бақ сынайды. Олар Ресейдің «Локомотив» (Ярославль), «Сибирь» (Новосібір), «Трактор» (Челябі) және «Авангард» (Омбы) ұжымдарына қарсы ойнайды.