Маржықпаев пен Головкин Қазақстан құрамасының Олимпиадаға дайындығын талқылады

Маржықпаев пен Головкин Қазақстан құрамасының Олимпиадаға дайындығын талқылады
Басқа

ҰОК

Астанада ҚР туризм және спорт министрі Ермек Маржықпаев пен Қазақстан ҰОК президенті Геннадий Головкин Франция астанасы Париж қаласында өтетін Олимпиада ойындарына қатысатын құраманың дайындығын талқылады, деп хабарлайды BasSport.kz. 

ҚР Ұлттық олимпиадалық комитеттің баспасөз қызметі атап өткендей, кездесудің басты тақырыбы – жазғы ойындарға дайындықтың соңғы кезеңі, сондай-ақ, ҰОК пен Министрлік қызметкерлерінің төртжылдықтың басты додасына дайындық деңгейі болды. Бұған дейін екі ұйым басшылары арасында спорттық делегацияны жасақтау барысында бапкерлер мен кешенді ғылыми топ мүшелеріне (дәрігерлер, массажшылар) басымдық берілетіні жайлы келісім жасалған. Осылайша, Париждегі Олимпиада ойындарына қанша атлет аттанса, сонша бапкер мен медициналық қызмет мамандары жол тартады. Екеуара әңгіме барысында Туризм және спорт министрі мен Қазақстан ҰОК басшысы отандық спортты дамытып, ұлттық құрама халықаралық деңгейде, оның ішінде, жаңа олимпиадалық циклде жақсы нәтиже көрсету үшін күш біріктірудің маңызды екенін тағы да атап өтті. Жұмыстың нақты жоспары Париждегі Олимпиада ойындары аяқталған соң талқыланбақ. Сондай-ақ, Геннадий Головкин Қазақстан ҰОК командасының Астанада өтетін ауқымды іс-шара кезінде халықаралық ынтымақтастыққа жәрдемдесіп, Дүниежүзілік көшпенділер ойындарын ұйымдастыруға көмектесуге дайын екенін мәлімдеді. Естеріңізге сала кетейік, Франция астанасы Париж қаласында өтетін XXXIII жазғы Олимпиада ойындары 26 шілде мен 11 тамыз аралығында өтеді. Ойындарға әлемнің 205 елінен 10 500 спортшы қатысады деп жоспарланған. Онда 32 спорт түрінен 329 медаль жиынтығы сарапқа салынады.