Екі қазақ боксшысы Азия чемпионатының финалында өзара мықтыны анықтайды
ҚБФ
2026 жылғы Азия чемпионатының финалында аса ауыр салмақ дәрежесінде екі қазақ боксшысы — Қазақстан құрамасының капитаны Айбек Оралбай мен Қытай құрамасы сапындағы этникалық қазақ Данабек Байқоныс өзара мықтыны анықтайды. Байрақты бәсеке World Boxing ұйымдастыруымен Улан-Батор қаласында өтіп жатыр, деп хабарлайды Bassport.kz.
Жартылай финалда Данабек Байқоныс үндістандық Нарендермен қолғап түйістірді. Бірінші раундта қарсыласы ауыр жарақат алып, жекпе-жек мерзімінен бұрын тоқтатылды. Нәтижесінде төрешілер техникалық шешіммен (4:1) жеңісті Байқонысқа берді.
Ал Айбек Оралбай өз жартылай финалында түрікменстандық Довлет Исламовты 5:0 есебімен айқын басымдықпен жеңіп, финалға жолдама алған болатын.
Осылайша, Айбек Оралбай мен Данабек Байқоныс арасындағы шешуші жекпе-жек 10 сәуір күні өтетін финалдық сессия аясында өтеді.