Ербол Хамитов пара биатлоннан Әлем кубогының күміс жүлдегері атанды
Бүгін Италияның Валь-ди-Фьемме қаласында өткен пара биатлоннан Әлем кубогының кезеңінде қазақстандық спортшы Ербол Хамитов отырып сырғанау санатындағы спринттік жарыста (Men’s Sprint Pursuit Sitting) 11:50.0 уақыт нәтижесімен күміс жүлдеге ие болды.
Бұл сында бірінші орынды Канада өкілі Дерек Заплотинский (11:42.3) иеленсе, қола жүлде Қытай спортшысы Лю Цзисюйге (12:11.1) бұйырды.
Айта кетейік, бұл жарысқа Қазақстан атынан тағы бір спортшы – Сергей Усольцев қатысып, жарысты жеңімпаздан +3:11.7 уақыт айырмашылығымен аяқтады.
Жарыс 30 қаңтарға дейін жалғасады. Одан кейін Қазақстан спортшылары 6-9 ақпан аралығында Словенияның Поклюка қаласында өтетін пара биатлоннан Әлем чемпионатына және 8-11 наурыз аралығында Швецияның Торсбю қаласында өтетін Әлем кубогының финалына қатысады.
Аталған жарыстар Милан-Кортина 2026 Қысқы Паралимпиада ойындарына іріктеу кезеңдері болып табылады.