Демеу Жадраев Олимпиада-2028 ойындарына қатысуы мүмкін
Күрес
ҰОК
Қазақстанның грек-рим күресі бойынша бас бапкері Юрий Мельниченконың айтуынша, париждік Олимпиадада сенсациялық күміс жүлде жеңіп алған Демеу Жадраев 2028 жылы Лос-Анджелесте өтетін Олимпиадаға қатысу мүмкіндігін қарастыруда, деп хабарлайды Bassport.kz Sportnews.kz-ке сілтеме жасап.
— Онымен сөйлескенде байқағаным, Париждегі жетістігі оған үлкен серпін берген. Ол күресті жалғастыруға ниетті. Жасына қарамастан, өз мүмкіндіктерін толық түсініп, жетілдіретін тұстарын анықтады. Сондықтан әрі қарай күресуге белсенді дайындалып жатыр, — деді Мельниченко.
Еске салайық, өткен жылы Париж Олимпиадасында Демеу Жадраев 77 келіге дейінгі салмақта күміс медаль жеңіп алған болатын. Финалда 34 жастағы қазақстандық балуан жапондық Нао Кусакадан жеңілді.