Шалдар халқы Гимназиада жүлдегері Қалыбек Нұрқожаны дүркіретіп қарсы алды
Күрес
Сербияның Златибор қаласында өткен ISF U15 халықаралық Гимназиадасынан жүлдемен оралған Қалыбек Нұрқожаны туған ауылы – Шалдар жұрты ерекше қошеметпен қарсы алды.
Ауыл халқы жиналып, концерттік бағдарлама ұйымдастырып, жас балуанның құрметіне шағын мереке өткізді.
Еркін күрестен қола жүлде еншілеген Қалыбек – Auyl Sport жобасының қатысушысы. Ол 2024 жылғы республикалық турнирдің жүлдегері ретінде халықаралық жарысқа жолдама алған болатын. 55 елден 2500-ден астам спортшы қатысқан дүбірлі додада 13 жастағы Қалыбек қазақ елінің қоржынына медаль салды.
Auyl Sport – 2024 жылдан бастап ауыл жастарына арналған ең ірі республикалық спорттық жоба. Былтыр еліміздің 200-ге жуық елді мекенінен 12 мыңға жуық спортшы қатысқан. Жоба бокс, күрес, шахмат, волейбол сынды спорт түрлерін қамтиды.