Майк Тайсон қайтып оралады: қартайған шағында шаршы алаңға шыққаны үшін қанша қаражат алады?
Global Look Press
Аңызға айналған боксшы Майк Тайсон 15-нен 16 қарашаға қараған түні рингке оралып, Джейк Полмен қолғап түйістіреді, деп хабарлайды Bassport.kz.
58 жастағы Тайсонның бұл жекпе-жегі жанкүйерлер арасында үлкен қызығушылық тудырып отыр. Билеттердің VIP орындардағы құны шамамен 1,55 миллион фунт стерлингті (шамамен 900 миллион теңге) құраса, боксшылардың гонорары да керемет соманы құрайды. The Sun мәліметіне сүйенсек, боксшылар осы жекпе-жек үшін әрқайсысы шамамен 31 миллион фунт стерлингтен алады. Жекпе-жек АҚШ-тағы Техас штатының AT&T аренасында өтіп, Қазақстан уақыты бойынша 16 қараша күні таңғы сағат 8-де басталады.
Айта кетсек, Тайсон мен Пол арасындағы жекпе-жек бастапқыда 21 шілдеде өтуі керек болатын, бірақ Тайсонның денсаулығына байланысты кейінге шегерілді. Тайсонның кәсіби рингтегі мансабы 1985-2005 жылдар аралығында 58 жекпе-жектен тұрады, оның 50-інде (44-і нокаутпен) жеңіске жеткен.
Джейк Пол — 2020 жылы кәсіби боксқа шыққан танымал америкалық блогер, оның есебінде 10 жеңіс (7-і нокаутпен) және бір жеңіліс бар.
Айта кетейік, бұған дейін Пол Тайсонға төрт раундтан артық шыдаса, 5 миллион доллар сыйақы ұсынған болатын.