Qazsport телеарнасы спорт комментаторларының қаламақысын көтерді
ашық дереккөз
Қазақстандағы басты спорт арналарының бірі Qazsport телеарнасы спорт комментаторларының қаламақысын айтарлықтай көтеретінін хабарлады. Бұл шешім осы мамандықтың тартымдылығын арттыруға және спорттық хабарлардың сапасын жетілдіруге бағытталған. Спорттық масс-медиа, блогерлер және спорт комментаторлары қауымдастығының президенті Олжас Байбосынов пен телеарна директоры Нағи Қалтайұлы Бақытбековтың сәтті келіссөздерінің нәтижесінде қаламақы көлемі ұлғая түсті. Бұл туралы Bassport.kz 1bol.kz-ке сілтеме жасап хабарлайды.
Qazsport қазақстандық медиа нарықта жетекші орынға ие. Бұл - «Otau TV» спутниктік желісі мен кабельдік операторлар арқылы қазақ және орыс тілдерінде хабар тарататын еліміздегі алғашқы мамандандырылған спорт телеарнасы. Соңғы жылдары арна белсенді дамып, танымал спорт түрлері – футбол, бокс, хоккей, күрес түрлерінен хабар таратуда. Алайда бұл жолы спорттық шаралар емес, қызметкерлердің жағдайын жақсартуға бағытталған өзгерістер назар аудартады.
Комментаторларды қандай өзгерістер күтіп тұр?
Негізгі жаңалық – қаламақыны 40%-ға арттыру. Бұл комментаторлар жұмысының барлық аспектілеріне әсер етеді: матчтарға дайындалудан және тікелей эфирде жұмыс істеуден бастап, ұзақ мерзімді спорттық іс-шараларға қатысуға дейін. Бұл өзгерістер комментатор мамандығын қаржылық тұрғыдан тартымды әрі сапалы ете түседі.
Басшылық мұндай қадамға не үшін барды?
Комментаторлардың жалақысын ұлғайту идеясы ұзақ уақыттан бері талқыланып келеді. Енді, міне Олжас Байбосынов пен Нағи Бақытбековтің нәтижелі келіссөздерінен кейін оң шешім қабылданды. Төлемақыларды көтеру еңбек жағдайын жақсартып қана қоймай, спорттық хабарлардың сапасын арттыруы тиіс.
Қауымдастық президенті Олжас Байбосынов бұл шешімі үшін телеарна басшылығына алғысын білдірді.
«Біз Qazsport телеарнасына қаламақыны 40%-ға көтергені үшін алғыс айтамыз. Бұл - комментаторларымыздың жұмыс жағдайын жақсартуға бағытталған маңызды қадам. Алдағы уақытта Қауымдастық кәсіп иелерінің барлық өкілдерінің жалақысын арттыру мақсатында басқа телеарналармен келіссөздер жүргізуді жоспарлап отыр», - деді ол.