Бокс: екі қазақ баласы әлем чемпионы атануы мүмкін
Бокс
Бүгін бокстан Ташкентте өтіп жатқан әлем чемпионатының финалдық кезеңі басталады, деп хабарлайды BasSport.kz тілшісі.
Финалға өткен бес қазақ боксшысының екеуі бүгін шешуші кезеңде бақ сынап, алтын жүлдені сарапқа салады.
48 келіде өнер көрсететін Санжар Тәшкенбай грузиялық Сахил Алахвердовимен әлем чемпионы атағына таласады. Ал 67 келіде ел намысын қорғап жүрген Дулат Бекбауов шаршы алаң иесі Асадхожа Муйдинхужаев шеберлік байқасады.
Финалдық жекпе-жектер Астана уақытымен 17:55-те басталады. Отандастарымыздың финалдағы жұдырықтасуларын Qazsport телеарнасынан тікелей эфирде көруге болады.
Айта кетейік, Санжар Тәшкенбай бірінші, ал Дулат Бекбауов екінші жұпта шаршы алаңға көтеріледі.