Универсиада: Қазақстан ізін басып келе жатқан Словакиямен кездеседі
АҚШ-тың Лейк Плэсидінде өтіп жатқан 2023 жылғы ХХХ қысқы Универсиада ойындарының хоккей турнирі іріктеу кезеңі аясындағы төртінші матчын Қазақстан құрамасы Словакияға қарсы өткізеді, деп хабарлайды BasSport.kz тілшісі.
Қазақстан студеттер құрамасы 16 қаңтар күні таңда Ұлыбританиямен кездесіп, 15:1 есебімен жеңіске қол жеткізген. Батырлан Мұратов хет-трик, Максим Мухаметов дубль авторы атанған, өзге де ойыншылар өз есептеріне бір-бір шайбадан жазған. Словакия құрамасы болса, АҚШ-пен кездесіп, 5:2 есебімен жеңіске жеткен.
Қазір жарыстың В тобының турнирлік кестесінде екі құраманың да еншісінде 9 ұпайдан бар, десе де жекелеген көрсеткіштер бойынша Қазақстан алды және біздің ұлттық құрама көш басында келеді.
Матч Астана уақытымен 03:30-да басталады.