Роналду мен Канте бір клубта өнер көрсетулері мүмкін
Сауд Арабиясының "Әл-Наср" футбол клубы Криштиану Роналдумен қатар, франциялық жартылай қорғаушы Нголо Кантеге қызығушылық танытып отыр, деп хабарлайды bassport.kz тілшісі "Foot Mercato" басылымына сілтеме жасап.
Қазіргі таңда франциялық футболшы "Челси" командасында өнер көрсетеді, алайда клуб мен спортшы арасындағы келісімшарт келер жылдың маусым айында аяқталады. "Әл-Насрдан" өзге, 31 жастағы жартылай қорғаушыға испаниялық "Барселона" қызығушылық танытып отыр. Алайда команданың қаржылай жағдайы Кантені сатып алуға әзірге мүмкіндік берер емес. Футболшының өзі де Сауд Арабиясы клубы сапында өнер көрсетуге қарсы емес көрінеді.
Еске салайық, Нголо Канте 14 тамыздан бері алаңға шыққан жоқ. "Челси" ойыншымен келісімшартты ұзарту мәселесін көп жарақат алуына байланысты қарастырмай отыр.