Ұлттық құрама командалардың ФИФА-дан алар сыйақы мөлшері белгілі болды
2022 жылғы Катардағы әлем чемпионатының аяқталғанына бір аптаға жуық уақыт болды. Өткен күндері ФИФА жаңартылған рейтингті ұсынса, бүгін әлем чемпионатында бақ сынаған ұлттық құрамалардың қанша сыйақы алатыны белгілі болды, деп хабарлайды bassport.kz тілшісі.
NBC Sports мәліметінше, турнирге қатысушы елдер үшін ФИФА 410 млн еуродан астам қаражат бөлген, ол команданың жарыс жолын қай кезеңед аяқтағанына байланысты беріледі.
Әлем чемпионатына қатуысуға мүмкіндік алған, алайда топтық кезеңнен әрі аса алмаған құрамалар 8,5 млн еуродан алады, олар: Катар, Эквадор, Уэльс, Иран, Мексика, Сауд Арабиясы, Дания, Тунис, Канада, Бельгия, Германия, Коста-Рика, Сербия, Камерун, Гана мен Уругвай.
Доп додасындағы жарыс жолын 1/8 финалдан аяқтаған АҚШ, Сенегал, Австралия, Польша, Испания, Жапония, Швейцария мен Оңтүстік Корея құрамаларының еншісіне 12 млн еуродан келеді:
Жартылай финалға өте алмаған 4 команда 16 млн еуродан алады: Бразилия, Нидерланд, Португалия, Англия.
Чемпионат қорытындысында төртінші орынға тұрақтаған Марокко құрамасы ФИФА-дан шамамен 23,5 млн еуро, қола жүлдегер Хорватия 25,5 млн еуро сыйақы алады. Күміс медаль иеленген Франция құрамасына 28 млн бұйырса, чемпион Аргентина командасына 37,5 млн сыйақы беріледі.