Үшінші кездесуде кім үздік болады? "Барыс" - "Салават Юлаев" матчының аңдатпасы
«Барыс» пен «Салават Юлаев» осы маусымдағы кездесулерін Астанада жалғастырады. Бұған дейін командалар екі мәрте Уфада кездесті. Бірінші матчта айдын иелері жеңіске жетсе (5:1), келесі кездесу қонақтардың еншісінде қалды (2:0).
Виктор Козловтың шәкірттері «Барыстан» жеңілгеннен кейін, өз айдынындағы тағы екі матчта жеңіліс тапты. Уфалықтар соңғы ойынын «Сибирьге» қарсы өткізіп, 1:2 есебімен жол берді. «Салават Юлаевтың» жалғыз голын Николай Кулёмин соқты. Қақпашы Андрей Кареев 24 соққыға тосқауыл бола білді. Ол қақпаға бағытталған соққыларды қайтару көрсеткіші бойынша Құрлықтық хоккей лигасындағы топ-5 қақпашының тізіміне енеді және сенімділік коэффициенті бойынша екінші орында тұр. Ойыннан кейін «Салават Юлаевтың» бас бапкері өз шәкірттерінің пас беруде көп қателесетінін және шабуылда агрессия жоқ екенін айтты.
Маусымдағы 31 кездесуден кейін Башқұртстан астанасының командасы 41 ұпаймен Шығыс конференциясында төртінші орында келеді. Сергей Шмелев (11+10) – командадағы ең нәтижелі ойыншы. Жарақат алғандар тізімінде қорғаушы Райан Мёрфи, шабуылшылар Артём Пименов пен Джошуа Хо-Сэнг бар.
Өткен сенбіде «Барыс» өз айдынындағы матчтар сериясын «Амурмен» бастап, 1:3 есебімен жеңіліп қалды. Аңсар Шайхмедденов маусымдағы үшінші шайбасын соқты. Ұзақ үзілістен соң, Никита Михайлис алғашқы матчын өткізді. Юлиус Гудачек 27 соққыны кері қайтара білді. Андрей Скабелка алға қойған мақсаттарға жету үшін командасының басқаша ойын өрнегін көрсетуі керек екенін атап өтті.
«Салават Юлаевпен» болар матчтың алдында «Барыс» Шығыс конференциясының турнирлік кестесінде 10-орында тұр. Команда еншісінде 32 кездесуден кейін 28 ұпай бар. Джереми Бракко (7+13) – осы маусымда 20 ұпай жинаған командадағы бірінші ойыншы. Бүгінгі матчта айдын иелеріне Майкл Шапю көмектесе алмайды. Аңсар Шайхмедденовтің де ойынға қатысуы белгісіз.
Матч астана уақытымен 19:30-да «Барыс-Аренада» басталады.
Ойынды тікелей эфирде KHL телеарнасы мен BasSport сайтынан көруге болады.