Екі команданың да қарашадағы көрсеткіштері көңіл көншітпейді: “Барыс” - “Металлург” матчы алдында
11 қараша күні елордалық “Барыс” сырт айдындағы кезекті матчтар сериясын бастап, магнитогорскілік “Металлургқа” қарсы тұрады.
Илья Воробьевтің шәкірттері қатарынан 4 ойында жеңіліс тапты. Сондай-ақ қарашадағы нашар ойыны салдарынан Шығыс конференциясындағы көшбасшылығынан айырылып қалды. Өткен ойында Никита Коростелев пен Максим Карповтың екі шайбасы “Авангардты” тізе бүктіру үшін жеткіліксіз болды. Ал олардың қақпашысы Эдди Паскуале 24 соққыны қайтарды.
ҚХЛ тұрақты маусымындағы 28 ойыннан кейін “Барыстың” бүгінгі қарсыласының еншісінде 37 ұпай бар. Бұл команда Лиганың ең нәтижелі үш ұжымының қатарына кіреді. Филипп Майе (11+7), Максим Карпов (5+14) пен Брэндон Лайпсиктердің (3+15) еншісінде 18 ұпайдан бар. Ал қорғаушы Артем Минулин жарақат алғандар тізімінде.
“Барыс” та қарашада қарқын ала алмай келеді. Ұзаққа созылған жеңілістер сериясынан кейін “Барыс” плей-офф “сегіздігінің” қатарынан шығып қалды. Ал соңғы матчта астаналық команда “Витязьге” 2:3 есебімен жол берді. Аркадий Шестаков пен Дінмұхамед Қайыржан нәтижелі соққымен көзге түсті. Бүгінгі матчқа жарақатынан айыққан Аңсар Шайхмедденов шығады, ал Никита Михайлис сырт алаңдағы осы ойындар сериясында да командаға көмектесе алмайды.
Сонымен қатар, бүгінгі матч “Барыстың” бас бапкері Андрей Скабелканың 500-мерейтойлық матчы болмақ.
”Барыс” пен “Металлург” арасындағы матч Астана уақытымен 20:00-де басталады.