Мессидің әкесі туралы жалған хабар Аргентинада үлкен дау туғызды, президент те пікір білдірді

Аргентинадағы Luzu TV арнасы тікелей эфирде Лионель Мессидің әкесі Хорхе Мессидің қайтыс болғаны туралы жалған ақпарат таратып, бұл оқиға футболшының отбасының наразылығын, жүргізушінің қызметтен кетуін және ел президентінің сынына себеп болды, деп хабарлайды Bassport.kz Sports.ru сайтына сілтеме жасап.

Хорхе Мессидің денсаулығына қатысты қауесеттер Аргентина құрамасының Алжирге қарсы матчынан кейін тарай бастады. Кездесу барысында гол соққан Лионель Месси көзіне жас алып, өміріндегі қиын кезеңді бастан өткеріп жатқанын айтқан болатын. Осыдан кейін бірқатар БАҚ оның әкесі жүрек ауруына байланысты ауруханаға түскені туралы ақпарат жариялады.

Алайда жағдайды одан әрі ушықтырған Luzu TV арнасы болды. Тікелей эфир кезінде жүргізуші Флоренсия Пенья көрермендерге Хорхе Мессидің қайтыс болғаны туралы хабарлады. Кейін белгілі болғандай, ол бұл мәліметті эфир барысында құлаққап арқылы алған ақпаратқа сүйеніп айтқан.

Жалған хабар әлеуметтік желілерде әп-сәтте тарап кетті. Алайда бірнеше минуттан кейін Пенья мәліметтің расталмағанын айтып, сөзін кері қайтарды.

Біраз уақыт үнсіз қалған Месси отбасы кейін ресми мәлімдеме жасап, Хорхе Мессидің денсаулығында белгілі бір мәселелер бар екенін, бірақ оның дәрігерлердің бақылауында екенін және жағдайы жақсарып келе жатқанын хабарлады. Сондай-ақ отбасы кейбір БАҚ-тың жеке өмірге қатысты мәселелерге жауапсыз қарағанына наразылық білдіріп, нақты ақпарат тек жақын туыстарында ғана бар екенін атап өтті.

Аргентина журналистерінің мәліметінше, Лионель Месси бұл жағдайға қатты ашуланған. Әлеуметтік желі қолданушылары оның жұбайы Антонела Рокуццоның Instagram желісінде Luzu TV арнасы мен Флоренсия Пеньяның парақшасына жазылуын тоқтатқанын байқаған.

Өз кезегінде Luzu TV арнасының басшысы Николас Оккьято эфирде болған оқиға үшін өкініш білдіріп, жауапты адамдарға қатысты шара қолданылатынын мәлімдеді. Кейінірек Флоренсия Пенья бағдарламадан кететінін хабарлап, жұртшылықтан кешірім сұрады. Ол сондай-ақ Мессидің анасымен жеке сөйлескенін айтты.

Оқиғаға Аргентина президенті Хавьер Милей де пікір білдірді. Мемлекет басшысы жүргізушінің әрекетін жауапсыздық пен адамның жеке өміріне құрметсіздік деп бағалап, оны қатаң сынға алды.

Әлеуметтік желілердегі мәліметтерге сәйкес, дау-дамайдан кейін Luzu TV бір тәулік ішінде шамамен 200 мың жазылушысынан айырылған. Сонымен қатар арнамен жұмыс істеген бірнеше жарнама беруші компания ынтымақтастықты тоқтатқан. #месси #аргентина #футбол