«Ақтөбе» футбол клубының бюджеті белгілі болды
Футбол
ФК “Ақтөбе”
Ақтөбе облыстық дене шынықтыру және спорт басқармасының басшысы Мейрамбек Махамбетов жаңа стадион құрылысы мен «Ақтөбе» клубының алдағы маусымға арналған бюджеті туралы айтып берді, деп хабарлайды BasSport.kz, МИА «ҚазАқпарат» сілтеме жасап.
35 мың орындық стадионның құрылысы басталады. Сондай-ақ 5 мың адамға арналған спорттық арена салынады. Мұнда бассейн, көркем және спорттық гимнастика залдары болады. Құрылыс жұмыстарынан бөлек, өңірдің спорттық командаларына да қомақты қаражат қарастырылған.
«Биыл „Ақтөбе“ футбол клубына 2,4 млрд теңге бөлінді. Клубтан Қазақстан чемпионатында, Қазақстан Кубогында жоғары жетістіктер талап етіледі. Сондай-ақ халықаралық жарыстар да бар. Қазіргі уақытта легионерлердің еңбекақы төлеу ережелеріне өзгерістер енгізу туралы құжатты күтіп отырмыз. Заң бойынша оларға бюджеттен тыс еңбекақы төлеу қарастырылған. Бұл бағытта жұмыс жүргізіп жатырмыз.
Мини-футбол бойынша ересектер командасына — 450 млн теңге, Балалар футбол орталығына — 300 млн теңге, Әйелдер футболына — 100 млн теңге бөлінді», — деді Ақтөбе облыстық дене шынықтыру және спорт басқармасының басшысы Мейрамбек Махамбетов.